ابڙو اڪيڊمي Abro Academy
2020-07-19
داخلا نمبر 546
عنوان مِيٽر، سون ڦِدي ، تيل وهيڙو
شاخ پکي
پڙهيو ويو 297
داخلا جو حوالو:
مِيٽر، سون ڦِدي ، تيل وهيڙو
مِيٽر، سون ڦِدي ، تيل وهيڙو
دنيا جي ننڍي ۾ ننڍي قسم جي هن پکيءَ جا سنڌ ۾ ڪافي نالا آهن. ان جو قد بت ڪنهن وڏي ڀونئر جيڏو يا ڪجهه وڌيڪ يعني 10 سينٽي ميٽر ٿئي ٿو. باغن، ٻيلن ۽ صحرائن ۾ هر ان جاءِ تي ٿئي ٿو جتي گل ٿيندا هجن. پنهنجي ڊگهي ۽ مڙيل چهنب سان گلن جو رس چوسيندو رهي ٿو، ان ڪري هن کي ”گل رس چوس“ چوڻ به مناسب آهي، پر ڪڏهن ڪڏهن ننڍڙيون مکيون به کائي ٿو. گل جو رس چوسڻ مهل هوا ۾ هڪ ٽِڪ بيهي رهندو آهي ۽ پَـر ايتري تيزيءَ سان کڻي ٿو جو ذري گهٽ نظر ئي نه ايندا آهن. اڏامڻ جو تکو آهي، لڳ جي مند ۾ نر جو رنگ چمڪدار ڪارڙو ۽ تيز واڱڻائي سائو ۽ ماديءَ جو رنگ زيتوني ٿئي ٿو. نر سڄو ڪارڙو ڏسبو آهي پر ماديءَ جي پيٽ جو رنگ هلڪو زيتوني ۽ اڇڙو هوندو آهي. جڏهن لَڳ جي مند نه هوندي آهي ته نَر جو رنگ به زيتوني ٿي ويندو آهي ۽ ڳچيءَ کان ڇاتيءَ تائين نيرڙو واڱڻائي پٽو ظاهر ٿيندو اٿس، باقي بت مادي جي رنگ جهڙو ٿي پوندو اٿس. بلوچي ۽ فارسيءَ ۾ هن کي ”دنبرگ“ به چوندا آهن. هي پکي ماحول: 3 ۾ رهي ٿو.